 |
| Gonzalo Castro, candidato á alcaldía de Ordes polo BNG, durante a súa intervención. |
Tamén promete aprobar o PXOM este mesmo ano, un centro de día e unha casa da xuventude
O candidato do BNG á alcaldía de Ordes, Gonzalo Castro, presentou este luns o programa de goberno do BNG de Ordes nuns ateigados salóns do restaurante El Túnel, e anunciou o seu compromiso de “poñer en marcha, antes de que remate este ano, un viveiro de empresas, un centro de promoción económica, e a dinamizar e modernizar a praza de abastos, xa que a prioridade do próximo goberno municipal será a creación de emprego e a reactivación económica”.
O acto contou coa participación de Carlos Aymerich, portavoz do BNG no Parlamento de Galicia, que amousou o seu respaldo á candidatura de Castro á alcaldía. “O programa de goberno da candidatura encabezada por Gonzalo Castro conseguirá sacar a Ordes do seu atraso e poñelo no lugar que merece como cabeceira comarcal”, expuso o parlamentario.
"Sen discriminacións"
A número dous da candidatura do BNG de Ordes, Montserrat Rei, manifestou o compromiso do BNG “para demostrar aos veciños e veciñas de Ordes que outra forma de gobernar é posíbel, unha forma de gobernar que poñerá o concello de Ordes ao servizo de todos e todas, sen discriminacións”.
Castro manifestou que “o certo é que a ampliación do Concello non era unha obra prioritaria, mais xa non é a hora das críticas é a hora de buscar solucións á situación que está a vivir o noso concello, por iso, sen descoidar as necesidades administrativas do Concello de Ordes, destinaremos o espazo que se habilitará no novo edificio do Concello á creación dun viveiro de empresas e un centro de promoción económica, reformulando esta actuación para destinala ás prioridades que ten o noso Concello, a reactivación económica e a creación de emprego”.
O candidato do BNG á alcaldía de Ordes manifestou que “con esta actuación facilitaremos as instalacións e o asesoramento necesario aos novos emprendedores, co obxecto de impulsar o inicio da súa actividade nos anos máis duros, os do comezo da actividade empresarial”.
 |
| Asistentes ao acto da presentación do programa de goberno do BNG de Ordes. |
Castro anunciou que “este será o primeiro paso dunha actuación de goberno que ten como obxectivo recuperar o dinamismo económico de Ordes como cabeceira de comarca e recuperar os 500 empregos destruídos nos últimos catro anos”.
Finalmente, o candidato do BNG á alcaldía ordense fixo público o seu compromiso “para aprobar inicialmente o PXOM antes de que finalice 2011, e incluir nos Orzamentos Municipais de 2012 a dotación dun centro de día e unha casa da xuventude no noso Concello”.
*
