O Consello Escolar do Campomaior denuncia as "promesas" de Indalecio Cabana co seu centro

Indalecio Cabana, xefe territorial de Educación.

O xefe territorial de Educación da Xunta de Galicia visitou o centro en marzo e "garantiu" unhas melloras a día de hoxe inexistentes

O Consello Escolar do CEIP Campomaior ven de solicitar ao xefe territorial de Educación da Xunta de Galicia, Indalecio Cabana "que realice canto antes as obras de mellora no centro" que "prometeu" durante a súa visita ao centro de ensino no pasado mes de marzo. 

Cabana "indicou que non era posible facer unha ampliación, por razóns orzamentarias, pero si as modificacións que se lle pediron", sinala Mercedes Barros, presidenta do Consello Escolar do centro de ensino ordense. 

En concreto, se trata da adaptación dos baños das aulas de Educación Infantil, o traslado da aula de informática a outra dependencia, unha nova dotación de ordenadores, unha cuberta do paso do alumnado de transporte e outra para o patio de Educación Infantil. 

Promesas
Segundo denuncia agora o Consello Escolar, nunha "recente entrevista" que concedeu á dirección e a representante da Asociación de Nais e Pais (ANPA), Indalecio Cabana "seguiu prometendo" a realización dunhas melloras que a día de hoxe non se executaron.

*

Belén do Campo promete melloras no ensino de Ordes

De esq. a der. Ana Hervés, Mercedes Barros, Belén do Campo, José Luis Martínez Sanjurjo e Susana Mosquera, onte no CEIP Campomaior.

A delegada territorial da Xunta de Galicia tivo onte un encontro con representantes da comunidade educativa do CEIP Campomaior


Ana Hervés (ANPA) e a directora, Mercedes Barros, reclaman unha serie de obras no edificio

A delegada territorial da Xunta na nosa provincia, Belén do Campo, mantivo onte unha reunión de traballo no CEIP Campomaior de Ordes no que tamén subliñou o compromiso da Consellería de Cultura, Educación e Ordenación Universitaria na mellora dos equipamentos educativos do Concello de Ordes. Así llo trasladou ao portavoz municipal do Partido Popular, José Luis Martínez Sanjurjo, á tamén edil Susana Mosquera, e aos representantes da comunidade educativa do Campomaior.

No encontro, a directora do colexio, Mercedes Barros, e a membro da ANPA Ana Hervés trasladáronlle á representante do Goberno galego na provincia a necesidade de levar a cabo melloras no edificio, entre as que se atoparía a creación dun corredor cuberto no lateral do inmoble para facilitar o acceso dos alumnos e alumnas, a dotación de aseos adaptados na área de Educación Infantil ou o traslado da aula de informática. Pola súa banda, Do Campo comprometeuse a estudar estas propostas e a remitilas de inmediato ao departamento autonómico para o seu análise.

A delegada territorial tamén amosou a súa vontade de traballar intensamente para darlles cumprimento no menor prazo de tempo posible e beneficiar aos 360 rapaces de Educación Infantil e Primaria que estudarán neste centro educativo o vindeiro curso. 

Neste senso, Do Campo trasladoulle tanto á comunidade educativa como aos representantes políticos a disposición do Executivo galego de explorar todas alternativas para acadar a mellor solución e seguir mantendo a aposta da Consellería pola calidade do sistema educativo. 

A frase de Belén do Campo, delegada da Xunta de Galicia na provincia da Coruña

“A Xunta traballa para seguir avanzando na adecuación das infraestruturas co fin de continuar mellorando as condicións de traballo e estudo dos mestres e alumnos”

*

Os docentes do CEIP Campomaior suspenden actividades escolares como medida de protesta contra Xesús Vázquez

Non haberá biblioteca no recreo, nin préstamo de libros polas tardes, nin festivais, nin actividades extraordinarias, nin  saídas, e deixará de editarse a revista escolar Reviscole

A presidenta do consello escolar do CEIP Campomaior de Ordes, Mercedes Barros Otero, fixo pública hoxe a decisión do claustro de profesores de levar a cabo unha serie de medidas en protesta pola Orde de 23 de xuño de 2011 pola que se regula a xornada de traballo do persoal docente.

O claustro pretende así manifestarlle ao conselleiro de  Educación da Xunta de Galicia, Xesús Vázquez, que a aplicación desta nova normativa modificará o seu plan de traballo, "pois ó ter 25 horas lectivas nas que hai que atender as propias clases, as gardas de recreo, as gardas de transporte, o apoio ao alumnado doutras aulas, as substitucións do profesorado que falta...non queda tempo para a organización doutras actividades que se viñan realizando". O claustro considera que a Orde perxudica a calidade do ensino público e atribúe ao profesorado, traballos que non lle son propios, como a vixilancia do transporte escolar.


Catro medidas
Así, as medidas de protesta acordadas serán as seguintes:
1. Peche da biblioteca nos recreos e non facer préstamos pola tarde.
2. Clausura de festivais e saídas.
3. Suspensión de participacións en actividades extraordinarias, ainda cando estean financiadas por outros organismos.
4. Suspensión da Reviscole e dos murais da entrada.

*