miércoles, 23 de abril de 2014

O PSOE de Ordes reclama que a rectoral de Outeiro se convirta nun albergue

En 2010 xa se lle fixo chegar á Xunta un proxecto técnico

O PSOE de Ordes proporá no pleno municipal de mañá que a Administración autonómica retome o proxecto de conversión da antiga casa rectoral do Outeiro, na parroquia de Poulo, en albergue para peregrinos. A moción,de aprobarse, dirixiríase á Sociedade Anónima de Xestión do Plan Xacobeo, na actualidade integrada na Axencia de Turismo de Galicia.

O portavoz municipal dos socialistas, Xesús Pedreira, explica que o Xacobeo leva anos con este proxecto paralizado. “No ano 2009, ante o aumento de peregrinos, o Concello pretendeu atendelos coa dotación deste albergue, e en 2010 fíxolle chegar á Xunta un proxecto técnico”.

Camiño Inglés
O proxecto de albergue suporía un pulo importante na atención dos centos de peregrinos que percorren o Camiño Inglés cada ano. Na actualidade, o Concello de Ordes ofrécelles aloxamento nas súas instalacións municipais, pero “o idóneo sería que dispoñan dun albergue situado ao pé da ruta xacobea”, segundo razoa Pedreira, que destaca tamén a relevancia económica que teñen os peregrinos para o sector hosteleiro ordense, tanto na capital municipal como no Mesón do Vento.

Rogos
Por outra parte, o líder socialista ordense empregará a quenda de rogos do pleno para emprazar ao Goberno municipal a explicar en que fase se atopa a entrada efectiva de Ordes no sistema de Transporte Metropolitano das áreas de Santiago e da Coruña. 

Ademais, Pedreira solicitará o arranxo da entrada do paseo fluvial do río Mercurín desde o Punto de Atención Continuada (PAC), na vila de Ordes, para que cando chova non haxa estancamentos de auga que impidan o acceso. 


Por último, os socialistas vanse interesar na sesión de mañá pola verificación dos recibos abonados polo Concello ás compañías eléctricas. Pedreira preguntará se se procedeu a examinalos para determinar se a contía é correcta. “De non ser así, haberá que pedir a súa devolución, xa que hai varios Concellos que viron incrementada a súa factura eléctrica sen motivos de gasto reais e xa reclamaron os importes pagados inxustamente”, manifesta Pedreira.

O PP de Ordes denuncia os riscos da mala sinalización horizontal na vila

Un paso de peóns da vila de Ordes.

Martínez Sanjurjo: "O estado dos pasos de peóns non permite demorar máis tempo a súa reparación"

O PP de Ordes ven de denunciar que a falta de mantemento da sinalización horizontal, especialmente pasos de peóns e bordos, na vila de Ordes, sen repintar na súa maior parte desde hai varios anos, supón un serio risco para a seguridade dos peóns, xa que nalgúns puntos dificilmente se visualizan as marcas no firme, especialmente cando o solo está mollado ou pola noite.

As frases de José Luis Martínez Sanjurjo, portavoz do Grupo Municipal Popular de Ordes 
“Desde o PP local pensamos que chegou o momento de arranxar estas carencias: porque o estado dos pasos de peóns non permite demorar máis tempo a súa reparación, e porque superado o inverno, os traballos poden desenvolverse con maiores garantías”


“Sabemos que cando os veciños se queixan do estado de abandono que presentan os equipamentos públicos de Ordes, desde o Concello se argumenta a carencia de recursos, pero non é menos certo que se están investindo cartos en actuacións pouco ou nada necesarias, mentres que intervencións esenciais, como as que afectan á seguridade das persoas foron adiadas indefinidamente nun exercicio de irresponsabilidade difícil de superar”

jueves, 17 de abril de 2014

O PSOE de Ordes convoca unha charla este luns sobre a suba do IVE nas perruquerías


Unanimidade ordense na defensa dos seus xulgados


A corporación mobilizará aos veciños en contra da desaparición do partido xudicial de Ordes

O pasado venres 11, a xunta de voceiros do Concello de Ordes celebrou unha xuntanza na que se abordou a posible desaparición do seus dous xulgados. 

Un encontro que estivo encabezado polo alcalde, Manuel Regos Boquete e a o que tamén acudiron a primeirea tenente de alcalde, Silvia Marín; o presidente da xunta de voceiros, Roberto González e os concelleiros Estrella Vázquez Varela (PP), Ramiro Recouso (BNG), Xesús Pedreira (PSOE) e Ana Álvarez (CideGa). 

A todos eles se uniron tamén os exconcelleiros Gonzalo Castro, Manuel Astray Mariño, Susana García Gómez e Marco Antonio del Río Pardo. Ao longo das máis de dúas horas de xuntanza analizáronse as consecuencias que suporía para Ordes a recente aprobación do Anteproxecto de Lei Orgánica do Poder Xudicial

Unanimidade
Entre o acadado figura a ratificación do acordo adoutado no pleno municipal do pasada mes de maio do ano 2012, no que por unanimidade se lle requería ao Consello do Poder Xudicial para que manteña Ordes como partido xudicial. 

Unha solicitude a través da que se lle instaba ao Ministerio de Xustiza a que no caso de que se producira a tramitación dun proxecto de lei que modifique a Lei 38/1988, de 28 de decembro, se manteña nesa reforma o actual partido xudicial de Ordes. 

No que se refire ao Goberno da Xunta de Galicia demandábaselle que no exercicio das súas competencias defendese expresamente o mantemento do partido xudicial de Ordes e ao mantemento dos xulgados Nº 1 e 2 actualmente existentes na vila ordense.

Acordouse tamén que sexa o alcalde quen convoque, pasadas as celebracións da Semana Santa, a todos os sectores sociais afectados. Preténdese así organizar e mobilizar á cidadanía para que apoien e se impliquen na loita en contra deste anteproxecto de lei, tratando así de evitar a súa aprobación polo Congreso dos Deputados.


Xulgados de Ordes 
Na actualizade a vila de Ordes conta con dous xulgados nunha sede na que realizan as súas funcións 20 traballadores e onde se celebran uns 3.000 procedementos ao ano

A súa supresión suporía un grave prexuízo para os máis de 32.000 veciños que cada ano requiren dos seus servizos e que se verían obrigados a desprazarse ata A Coruña. Unhas molestias que tamén afectarían aos residentes de concellos como Frades, Mesía, Ordes, Oroso, Tordoia, Trazo e Val do Dubra.

*

Begoña Lorenzo, convidada especial no clube de lectura de Ordes



A educadora familiar da Mancomunidade tamén explicoulle aos pequenos en que consiste a súa profesión

O clube de lectura da biblioteca de Ordes celebraron un novo encontro no que os seus integrantes comentaron e puxeron en común a lectura acordada para estas últimas semanas, Unha lúan na fiestra de Agustín Fernández Paz

Ademais tamén contaron cunha invitada moi especial, Begoña Lorenzo, educadora familiar da Mancomunidade de Ordes. Esta profesional integrada dentro da área dos servizos sociais da comarca tivo ocasión de explicarlle a todos eles en qué consiste a súa profesión e os principais obxetivos do seu traballo, así como as funcións máis habituais no seu día a día. 

O agasallo de Annia
Os nenos e nenas deste club aproveitaron a súa presenza para resolver dúbidas na resolución de conflictos e no comportamento máis adecuado tanto no ámbito académico como familiar. O agasallo de Annia escrito por Sabela Núñez é o seguinte título sobre o que se traballará na próximo encontro.

*

Programa de Semana Santa en Ordes


A carreira de cross ambiental chega a Ordes o 1 de maio

Patrocinada por Tahití Zumos Naturais, La Caixa, María Fraga, Eurofrut, Hamburguesería A Bolera, Deputación da Coruña e Concello de Ordes

O VI Cross Ambiental e a III Andaina Concello de Ordes Memorial Xosé Estebo  celebrarase o vindeiro xoves 1 de maio a partir das 17:00 horas. O Campo da Feira será o punto de encontro para todos os corredores. Unhas probas que o ano pasado congregaron a máis de 300 atletas de todas as idades.

Unha competición na que poderán participar xente de todas as idades con percorridos que van dende os 100 ata os 9.500 metros. Nesta edición os premios para os tres primeiros clasificados de cada categoría serán variados e irán dende cantidades en metálico a trofeos, medallas e agasallos sorpresa

A todos os participantes tamén se lles entregará gratuitamente unha entrada para poder disfrutar dunha xornada no Museo do Traxe Juanjo Liñares, ademais de froita e bebida coa que hidratarse unha vez concluida a proba.

Inscricións
Aqueles que queiran participar teñen ata o próximo 30 de abril ás 20:00 horas para inscribirse a través da web www.correrengalicia.com. Tamén dispoñen do teléfono 660694586 e do correo electrónico atletismoordes@hotmail.com para solicitar máis información.


Esta proba está organizada polo Club de Atletismo Ordes e patrocinada por Tahití zumos naturais, La Caixa, María Fraga, Eurofrut, Hamburguesería A Bolera, Deputación da Coruña e Concello de Ordes.

*