Clausurado por este ano o Voluntariado Verde

Estivo representada Novacaixagalicia por medio do director da sucursal ordense, Héctor Monelos

Xa está dispoñible na Casa do Concello a ficha para participar na edición dovindeiro ano

O Concello de Ordes, a través da concellería de Medio Ambiente, clausurou o pasado xoves o seu programa de Voluntariado Verde que se iniciara a principios deste ano.


Ao acto de clausura acudiron o edil responsable do departamento de Medio Ambiente, Xesús Pedreira, e o director da sucursal de Ordes da oficina Novacaixagalicia, Héctor Monelos Díaz, quen asistiu en representación da Obra Social que lle concedera ao Concello unha beca de medio ambiente para que unha persoa se encargara de guiar e axudar na elaboración deste proxecto de carácter medioambiental. No acto tamén estiveron presentes algúns dos voluntarios que participaron nesta iniciativa e que foron os verdadeiros protagonistas do proxecto, así como a coordinadora do programa.

Memoria de actividades
A presentación da memoria de actividades correu a cargo desta persoa, beneficiaria da beca e encargada de coordinar as distintas actividades durante este ano, Beatriz Busto, veciña do Mesón do Vento que conduciu maxistralmente ós voluntarios nos distintos bloques de actividades que conformaba o programa de Voluntariado Verde. Unhas actividades entre as que se encontraron a limpeza de ríos, a posta en valor dos roteiros do municipio, rutas de sendeirismo, charlas informativas sobre diferentes cuestións relativas ao medio ambiente, así como obradoiros e diferentes iniciativas dirixidas á concienciación dos cidadáns, tanto para nenos como para maiores.

Tamén durante o acto de clausura se deu a coñecer a plataforma informática que está dispoñible na web do Concello de Ordes (www.concellodeordes.com) e na que se recolle toda a información sobre o proxecto así como a posibilidade de descargar a ficha de participación en Voluntariado Verde para todos aqueles interesados en formar parte desta iniciativa de cara ó ano próximo.

A frase de Xesús Pedreira, concelleiro de Medio Ambiente de Ordes
"É de destacar e agradecer a gran labor que levaron a cabo os nosos voluntarios que de forma desinteresada contribuiron coa súa participación nos distintos bloques de actividades do programa de Voluntariado Verde a coidar e fomentar o respeto polo noso patrimonio natural e sin os que este proxecto non se podería levar a cabo"

*

Caixanova e o Concello poñen en marcha o programa Voluntariado Verde 2010

.
Os voluntarios que participen no programa municipal traballarán na defensa dos ríos, a vixiancia e prevención de lumes, nun programa de seguemento ambiental e en actividades na natureza e sendeirismo

O alcalde de Ordes, Manuel Regos, acompañado polo concelleiro de Medio Ambiente, Xesús Pedreira e o director da oficina de Caixanova do municipio, Héctor Monelos, presentaban esta mañá o programa Voluntariado Verde 2010.

Un programa, que se leva a cabo no municipio por segundo ano consecutivo, e a través do que, tal e como explicaron os responsables municipais, se traballará en catro áreas. Unha delas será a defensa dos ríos, que tivo un gran éxito na pasada edición coa limpeza dos cauces que se traduciu, como explicou Pedreira, en que a pesar do mal tempo e as choivas non se produciran inundacións en determinadas zonas do termo municipal nas que eran habituais.

Outra das áreas nas que traballarán estes voluntarios será a vixilancia e a prevención dos lumes, ademais de colaborar tamén na recuperación dos bosques afectadosa a trvés de novas plantacións.

Por outra banda tamén se realizará un programa de seguimento ambiental, a través do que se pretende dar a coñecer a fauna e a flora ordense aos seus veciños.

E por último, a través deste programa de Voluntariado Verde 2010, tamén se desenvolverán diferentes actividades na natureza e sendeirismo, estando xa en marcha no momento actual unha iniciativa que organizan a concellería de Medio Ambiente e a de Educación coa colaboración do IES Nº1, consistente nunha peregrinación por etapas polo Camiño Francés, dende O Cebreiro a Santiago.

Podes escoitar a presentación do programa a través das ondas de Radio Ordes facendo clic baixo estas liñas:



Agradecimento á Obra Social Caixanova
Ademais, tal e como explicou o alcalde, Manuel Regos, e o edil Xesús Pedreira, nesta ocasión contarase, para a coordinación do programa, co traballo dunha becaria durante seis meses, beca que corre a cargo da Obra Social Caixanova. Así o primeiro edil non tivo máis que palabras de agradecemento para dita entidade bancaria, palabras que lle quixo transmitir ao director da oficina de Caixanova de Ordes, Héctor Monelos.

Tanto Regos como Pedreira, agradeceron esta iniciativa de Caixanova, que ademais de permitir un mellor desenvolvemento do programa, crea tamén un posto de traballo, facendo fincapé no feito de que se trata ademais dunha veciña do municipio a que desenvolverá está función.

Pola súa banda, en representación de Caixanova, Héctor Monelos, agradeceu ao Concello o desenvolvemento deste tipo de iniciativas que asegurou, intentarán apoiar sempre dende a entidade que representa.

Dende o Concello de Ordes esperan poder poñer en marcha o proxecto a partir de mediados de maio para o que animan a todos os que estean interesados a que se apunten. Para máis información pódese chamar ao teléfono do Concello, o 981 680157 e poñerse en contacto co departamento de Medio Ambiente.

Foto: De esquerda a dereita, Xesús Pedreira, concelleiro de Medio Ambiente de Ordes; Manuel Regos, alcalde de Ordes; e Héctor Monelos, director da oficina de Caixanova de Ordes.

*