Malestar no PP con Regos por non convocar un pleno extraordinario "comprometido no seu día"

.
O PPdeG insiste en reclamar explicacións sobre o estado de elaboración do PXOM, as xestións para dotar a Ordes dun centro de día ou as axudas ao transporte para os estudantes

O Partido Popular de Ordes fixo hoxe público o seu malestar co goberno municipal por non convocar "o pleno extraordinario, comprometido no seu día, para debater asuntos de vital importancia para os veciños, como o estado de elaboración do Plan Xeral de Ordenación Municipal (PXOM), as xestións desenvolvidas para dotar a Ordes dun centro de día, as agardadas axudas ao transporte para os estudantes ordenses e para actividades culturais e deportivas, entre outros asuntos".

Pendentes de debate no pleno de novembro
Os populares recordan agora que estes asuntos "quedaron pendentes de debate no pleno ordinario de novembro, cuia duración foi acurtada para que os membros da corporación puidesen asistir ao funeral por Juanjo Liñares". Naquel momento, asegura a concelleira Estrella Vázquez, "o propio alcalde anunciara que os asuntos que non foron debatidos nesa sesión serían incluídos na orde do día dun pleno extraordinario que agora se resiste a convocar". Segundo a popular, esta negativa deixa en evidencia "que o alcalde é un home sen palabra do que xa ninguén se pode fiar”.

O PP de Ordes, aseguran en nota informativa, "amósase extremadamente decepcionado coa actitude do goberno municipal por negarse elaborar unha nova orde do día na que se inclúan todos os rogos e preguntas que quedaron sen contestar no pleno de novembro"

A frase de Estrella Vázquez, concelleira do PP de Ordes
"A negativa de Manuel Regos a convocar o pleno extraordinario para informar sobre asuntos de vital importancia para o futuro do municipio, evidencian as eivas democráticas do equipo que preside, ao tempo que poñen de manifesto as crecentes fisuras entre os socios dese executivo local cuatripartito"


Foto: Tras suspender o pleno do mes de novembro por mor da misa funeral por Juanjo Liñares, boa parte da corporación municipal trasladouse á cerimonia relixiosa oficiada no local social do Concello.



*