 |
| Antonio Castro García / Foto: Arquivo El Correo Gallego. |
En xuño de 1981 fora tanteado para encabezar as listas de AP ao Parlamento de Galicia que gañara Fernández Albor
Onte morría en Santiago aos 86 anos o xurista nacido en Ordes, Antonio Castro García. Foi alcalde de Santiago de Compostela entre 1974 e 1979, e posteriormente, presidente do consello de administración da editorial Compostela, empresa editora do xornal El Correo Gallego.
Tres candidatos
O que moitos non saben é que este ordense puido haberse convertido en candidato de Alianza Popular nas primeiras eleccións autonómicas da nosa historia, acontecidas o 20 de outubro de 1981. A comezos do verán dese ano, a Alianza Popular de Xosé Luis Barreiro e Manuel Fraga andaba na procura dun candidato a encabezar as listas pola provincia de A Coruña.
Luis Ortiz, vicepresidente de AP en Galicia entrevistara a tres candidatos para o posto: Antonio Garcia, Clemente González Peón, e Xerardo Fernández Albor. Ningún os tres prosperou, ainda que este último nome sería recuperado, logo da providencial intervención do xornalista Augusto Assía e a súa dona, Totora Fernández-España, grandes amigos do noso concello aos que eran moi frecuente ver xantar no Bar Juanito. Aquel encontro tivera lugar nunha comida na Casa Grande da Xanceda (Mesía), a apenas uns dez quilómetros de Ordes.
Algún día contaremos esta fabulosa historia que aconteceu ás portas do concello de Ordes e posibilitou que o doutor Fernández Albor encabezara, por sorpresa e no último día, as listas electorais de Alianza Popular fai agora trinta anos.
Descanse en paz, Antonio Castro García.
*
