Pedreira: "É lamentable a falta de información de Gonzalo Castro"
O goberno local do Concello de Ordes, tralo pleno da xunta local da concentración parcelaria da zona Beán- Pereira, que tivo lugar onte, explicou que todavía non se pode dar por finalizado o proceso, tal e como anunciaba hoxe na prensa o portavoz do BNG ordense, Gonzalo Castro.
Así, e tal e como explicaron dende o grupo de goberno, todavía hai que remitir o informe do acordo á Dirección Xeral de Desenvolvemento para a súa aprobación, e posteriormente será notificado a todos os propietarios de maneira individual que poderán interpoñer recurso de alzada dentro do prazo de trinta días hábiles dende a notificación, cuestións que tal e como explicou o concelleiro de Medio Ambiente, Medio Rural e Sanidade, Xesús Pedreira “pode todavía retrasar moito o proceso”.
O edil explicou tamén que nesta concentración todavía quedan sen abrir catro kilómetros de camiños secundarios, aínda que sí anunciou a próxima colocación dos marcadores.
"A información dada polos nacionalistas non é exacta"
“É lamentable a falta de información do portavoz do BNG acerca deste tema. A nós gustaríanos que a finalización da concentración de Beán-Pereira fose unha realidade, pero non é así, e a información dada polo edil nacionalista non é exacta”, dixo Pedreira.
No pleno da xunta local da concentración parcelaria da zona Beán- Pereira, tamén se explicou que ao proxecto se presentaron 164 alegacións, das que se estimaron 73, e 56 se estimaron en parte e foron desestimadas 35. En canto aos datos xerais da zona, a superficie total é de un pouco máis de 1.337 hectáreas.
Por outra banda o goberno local sí puido anunciar a firmeza de acordo para a finalización da concentración parcelaria de Ardemil, cuestión que calificaron de gran importancia para o municipio, despois de moitos anos de espera.
O vindeiro luns día 25 de outubro celebrarase no Concello de Ordes a reunión do pleno da Xunta Local da concentración parcelaria da zona Mercurín- Lesta II, na que se tratará o informe sobre o proxecto de camiños e o informe do proxecto da concentración parcelaria.
*
