Trátase dun sendeiro circular de 8,5 kilómetros que pasa polas parroquias de Buscás e Poulo e conecta nalgún tramo co Camiño Inglés
O municipio ordense conta xa cun novo roteiro para o disfrute de todos os amantes do mundo do sendeirismo, así como de veciños e veciñas e visitantes do municipio. Trátase do roteiro de San Paio e Outeiro, que xa pode ser utilizado, e que dá comenzo na parroquia de Buscás pasando por Poulo e rematando de novo en Buscás.
O alcalde Manuel Regos, acompañado polos concelleiros de Medio Ambiente Xesús Pedreira; de Educación, Mocidade e Discapacidade, Silvia Marín; de Cultura e Deportes, José Ramón Vázquez Raña e representantes do programa municipal de Voluntariado Verde de Ordes visitaron xa o roteiro facendo un primeiro percorrido polo mesmo. Na visita os representantes municipais tamén estiveron acompañados polos responsables das casas rurais Dona María e Antón Veiras, dous establecementos polos que pasa e que conecta este novo roteiro.
Este roteiro ordense foi posto en valor a través do programa de Voluntariado Verde do Concello de Ordes, cuxos participantes foron os encargados de levar a cabo o acondicionamento e a marcaxe de todo o percorrido.
Xa temos dous roteiros: San Paio e Outeiro, e río Mercurín
O roteiro de San Paio e Outeiro súmase agora a outro roteiro do municipio, o do río Mercurín, contando así Ordes con lugares atractivos para os amantes da natureza, tanto veciños como visitantes, que queiran disfrutar de xornadas ao aire libre favorecendo ademais a práctica de actividades físicas tan importantes para a saúde.
En canto ás características do roteiro, trátase dun sendeiro circular de 8,5 kilómetros que comenza nas inmediacións da Casa Rural Dona María para seguir pola Igrexa de San Paio de Buscás, e dende alí por un camiño de terra que sen desviarse pasa polo Muíño de Auga de Trabe conectando despois cun tramo do Camiño Inglés de Santiago.
Durante o traxecto crúzanse a ponte do Cubo, seguindo ata Outeiro de Abaixo e despois visita á igrexa de San Xiao de Poulo en Outeiro de Arriba. Neste tramo a ruta coincide co Camiño Inglés chegando ata a Casa Rural Antón Veiras. O percorrido continúa despois por Pardiñas para seguir de novo ata o seu punto de inicio en Buscás.
A duración aproximada da ruta é de 2 horas e media e a dificultade baixa.
Foto: Un grupo de concelleiros e hoteleiros ordenses xunto ao cartel do recén inaugurado roteiro de San Paio e Outeiro.
*
