Foron organizadas pola Asociación Cultural Tarandeira
Pedreira: “O coñecemento micolóxico contribúe directamente a que se mellore a xestión dos nosos montes"
O Concello de Ordes colaborou un ano máis nas Xornadas Micolóxicas, celebradas a pasada fin de semana, e que estiveron organizadas pola Asociación Cultural Tarandeira. Estas xornadas, que celebraron a súa séptima edición, constaron como ven sendo habitual, dun gran compoñente práctico e dinámico, nas que ademais da base teórica, realizáronse prácticas de recoñecemento de especies no transcurso das saídas ao monte. Este ano a charla introductoria á micoloxía correu a cargo do biólogo Martín Souto.
O principal obxectivo desta proposta é ensinar aos participantes cales son as principais especies de cogumelos que medran no monte e conciencialos da importancia do aproveitamento sostible da productividade micolóxica.
A frase de Xesús Pedreira, concelleiro de Medio Rural e Medio Ambiente de Ordes
“O coñecemento micolóxico contribúe directamente a que se mellore a xestión dos nosos montes, xa que o propietario afeccionado e concienciado procura a realización das correctas técnicas silvícolas (podas, rozas do mato e limpeza do soutobosque, plantación de árbores micorrizados,...) para desfrutar deste recurso".
*
