O PP reclama a Fomento un plan de seguridade viaria para a N-550 ao seu paso por Ordes

.
Logo do último accidente, que custou a vida a unha persoa esta semana, a deputada Belén do Campo presentará no Congreso unha batería de iniciativas parlamentarias para reclamar medidas de seguridade para ese trazado

Solicitará tamén un informe escrito no que se enumeren os diferentes accidentes acontecidos nesta estrada no último lustro e as súas consecuencias, así como unha análise das causas

A sinistralidade viaria que presenta o trazado da estrada N-550 que discorre polo concello de Ordes, e que esta semana volveu rexistrar unha nova víctima mortal, levará ao Partido Popular a reclamar do Ministerio de Fomento a adopción de medidas para frear esta tendencia, ao tempo que reclama unha análise exhaustiva sobre esta situación. A medida foi anunciada hoxe por Belén do Campo, deputada do Partido Popular no Congreso dos Deputados, e pola presidenta da xestora local do PP de Ordes, Estrella Vázquez.

Plan de seguridade
Belén Docampo anunciou a presentación de dúas proposicións non de Lei, coas que instará ao Goberno central a elaborar, nun prazo non superior a seis meses, un plan de seguridade viaria para o tramo ordense da N-550, dadas as numerosas deficiencias que presenta. Neste senso, Do Campo informou de que “unha das iniciativas presentarase na Comisión de Fomento e, outra, na Comisión de Seguridade Vial e Prevención de Accidentes de Tráfico”.

Do mesmo xeito, Estrella Vázquez anunciou que no próximo pleno municipal, que se celebrará o vindeiro 23 de febreiro, o grupo popular presentará unha moción para que o Concello inste ó Goberno Central a que tome medidas de inmediato e poña en marcha o Plan de Seguridade Viaria e o Plan de Acondicionamento da N-550 o seu paso polo municipio.

Segundo a deputada popular, "boa parte dese trazado presenta unha iluminación moi deficiente, carece de beirarrúas en moitos tramos e o firme presenta un moi mal estado de conservación en numerosos puntos".

Podes ver as imaxes da rolda de prensa desta mañá facendo clic baixo estas liñas:

:

Informe escrito
Simultaneamente, o Partido Popular reclama ao Goberno central un documento oficial no que se faga balance do número de accidentes rexistrados no trazado da N-550 que discorre por este concello coruñés, pedindo que se cuantifique o número total de sinistros, e se especifique cales se saldaron con vítimas mortais, cales con feridos e cales só con danos materiais nos vehículos e/ou nos bens que limitan coa estrada.

Os populares solicitan, ademais, unha ficha individualizada de cada sinistro, na que se dea conta do punto quilométrico e das causas, comprobadas ou hipotéticas, do accidente. Unha vez recompilados eses datos, os populares piden que o Goberno central –titular desa vía- elabore un informe global, ben a través do Ministerio de Fomento, ou do Ministerio do Interior –con competencias en materia de seguridade viaria- con conclusións sobre as causas da elevada sinistralidade que presenta ese tramo de vía.

Unha vez que lle sexa remitido, o Partido Popular porá este documento a disposición de tódolos veciños afectados, e tamén do Concello de Ordes.

Foto: A presidenta da xestora do PP de Ordes, Estrella Vázquez (esq.), e Belén do Campo, deputada do PP no Congreso de Madrid.

*