sábado, 4 de julio de 2009

Polígono de Poulo (III): Recouso afirma que Regos paralizou a tramitación do polígono ao paralizar o PXOM


Recouso: "Regos é consciente de que os veciños están a darse de conta de que os está enganando coas promesas electorais"

"Nestes dous anos o único que fixo o alcalde foi complicar e retrasar a tramitación do novo polígono ao paralizar o PXOM"

O concelleiro do BNG, Ramiro Recouso, quixo respostar ao alcalde das súas declaracións de onte afirmando que “Regos é consciente de que os veciños de Ordes están a darse conta de que os está enganando coas suas promesas electorais, por iso resposta ao BNG con descalificacións persoais que non lle van servir para ocultar a verdade”. Segundo Ramiro Recouso, “nestes dous anos, o único que fixo o alcalde foi complicar e retrasar a tramitación do novo polígono ao paralizar o Plan Xeral de Ordenación Municipal”.

"Incapacidade para sacar adiante un proxecto importante"
Segundo as declaracións do nacionalista, ao BNG non lle consta que o alcalde fixese xestións diante da Dirección Xeral de Urbanismo da Xunta "para intentar acelerar os trámites do novo polígono de Poulo” o que a xuizo de Recouso, “constitue unha proba da súa incapacidade para sacar adiante un proxecto moi importante para Ordes”.

“Regos", afirmou, "trata de enganar aos veciños e de desviar a súa atención con populismo, festa e propaganda, pero o tempo está comenzando a demostrar que o alcalde é incapaz de sacar adiante proxectos que xeneren emprego e riqueza no noso Concello”.

Finalmente, o edil emplazou a Regos a que “explique aos veciños de Ordes porque retrasou a tramitación do novo polígono, paralizando o PXOM, e porque en dous anos non realizou xestións diante da Dirección Xeral de Urbanismo co obxectivo de acelerar os trámites do polígono industrial de Poulo”.


*