jueves, 26 de noviembre de 2009

O Concello reparte entre os veciños 1.000 buxainas, 2.000 adornos de Nadal e 5.000 calendarios contra a violencia de xénero

.
Equipos de apoio ás víctimas de violencia de xénero de toda a comarca participarán hoxe nunha xornada formativa

O Concello de Ordes iniciou onte, Día Internacional contra a violencia de xénero, unha campaña de sensibilización dirixida a toda a poboación ordense que inclúe o reparto gratuito de peonzas, adornos de nadal e calendarios con lemas contra a violencia de xénero. A Concellería de Servizos Sociais entregou hoxe aos distintos centros educativos de Ordes un total de 1.000 peonzas co lema 'Ordes sen violencia', que serán repartidos mañá xoves entre todos os rapaces e rapazas do municipio.

Así mesmo, repartiranse tamén 5.000 calendarios co mesmo lema e 2.000 adornos de Nadal, coas formas dun reno e dunha árbore navideña, entre os veciños e veciñas de Ordes. O obxectivo é dar a coñecer a plataforma web presentada onte mesmo, www.ordessenviolencia.org, e facer que “as vítimas e as súas familias sintan de maneira especial o apoio da sociedade ordense nestas datas, así como que a propia sociedade teña presente a realidade da violencia contra as mulleres”, explica a concelleira de Servizos Sociais, Ana Álvarez.

Unha campaña organizada pola concellería de Servizos Sociais e a Terceira Idade en colaboración coa Secretaría Xeral da Igualdade da Xunta e do Centro de Información á Muller (CIM) de Ordes.

Equipos de apoio ás vítimas da violencia de xénero de toda a comarca participarán mañá xoves en Ordes nunha xornada formativa.

Xornada formativa
Así mesmo, mañá xoves, 26 de novembro, o salón de plenos do Concello acollerá unha xornada formativa denominada 'Equipos de apoio ás vítimas da violencia de xénero' na que participarán profesionais de toda a comarca de Ordes tanto do ámbito municipal coma do xudicial, sanitario e de seguridade.

Nestas xornadas, que terán lugar entre as 16:30 e as 20:30 horas, participarán Avelina Piñeiro Saloria, psicóloga clínica e forense, que falará sobre o maltrato psicolóxico como forma de control e poder do maltratador sobre a muller; María Sol Rodríguez Calvo, médica forense da Universidade de Santiago, que tratará sobre o papel da sanidade na violencia de xénero e todo o que pode facer na súa detección, valoración e intervención; José Manuel Sánchez Murias, xefe da Unidade Orgánica da Policía Xudicial na Coruña, que presentará o procedemento de actuacións da Garda Civil contra a violencia de xénero; e Manuel Ángel Cobas Otero, fiscal sustituto do Xulgado de Santiago, que disertará sobre as actuacións da xustiza diante da violencia de xénero.

*