 |
| O candidato popular José Luis Martínez Sanjurjo. |
"Estarei encantado de debater en Radio Ordes temas verdadeiramente importantes para os ordenses, como por exemplo a tramitación do PXOM"
Segundo as declaracións de onte de Pablo Quinteiro, director de Radio Ordes, o candidato do PP á alcaldía de Ordes, José Luis Martínez Sanjurjo rexeitaba a invitación a participar no debate da Lei de Augas que lle fixera o concelleiro de Réxime Interior e Comunicación, Manuel Astray. Ordessiete púxose en contacto co candidato popular para coñecer os detalles.
Pregunta. É certo que rexeitou a participación no debate da Lei da Augas en Radio Ordes?
Resposta. Si, así é.
P. E por que?
R. Pois moi fácil. A Lei de Augas é unha lei autonómica que foi debatida e posteriormente aprobada polo Parlamento de Galicia. Non hai nada máis que debater, é de obrigado cumprimento e agora so queda regular os seis regulamentos que a desenvolven.
P. Pero tan mala é esta lei para os ordenses?
R. Claro que non. En absoluto supón unha suba das tarifas como o BNG quere facernos crer.
"Existen temas máis importantes que esta Lei de Augas"
P. Logo por que toda esta polémica?
R. O BNG xa comezou con ela cando a lei aínda era un anteproxecto, alá polo outono pasado repartindo panfletos contra a mesma…Insisto, xa non hai nada máis que debater sobre esta lei que non fora debatido no Parlamento de Galicia, ademais existen outros temas moito mais interesantes para os veciños de Ordes, como as políticas municipais de emprego ou mesmo o Planeamento Xeral que é un tema que está bastante esquecido.
P. Seguirá o debate por Radio Ordes?
R. Si, o seguirei, aínda que non teño claro se finalmente se realizará. Ademais, quen irá ademais do BNG, o alcalde, Pedreira…?
"Astray e o BNG...e contra quen debaterán?"
P. Fálase de que pola parte do Goberno comparecerá Manuel Astray.
R. Pois moi ben se é Astray e o BNG…E contra quen debaterán? Insisto en que este debate non ten ningún obxecto, non hai nada máis que discutir desta lei xa aprobada polo Parlamento de Galicia.
P. Pero que rexeite este debate non quere dicir que non poida asistir a outros, non si?
R. Claro que non, todo o contrario, estarei encantado de participar en debates en Radio Ordes moito máis importantes que este.
P. Como por exemplo?
R. Pois como por exemplo a situación do Plan Xeral de Ordenación Municipal, que é unha medida trascendental para o futuro de Ordes.
*
