miércoles, 5 de diciembre de 2012

Hai acordo para sufragar a construción da cuberta do CEIP Castelao

O Concello de Ordes, a ANPA e a dirección do colexio Castelao correrán cos gastos 

”As obras do colexio Castelao acometerémolas conxuntamente entre a Asociación de Nais e Pais (ANPA), a dirección do centro e o Concello de Ordes”. Con estas palabras a tenente alcalde, Silvia Marín , explicaba no último pleno celebrado o pasado 29 de novembro o proxecto que se ten previsto acometer neste centro. “Trátase dun cuberto que se construirá para que os rapaces a partir do 3º curso poidan facer as filas para acceder ás aulas”, puntualizou Marín. 

A edila de Educación tamén adiantou “que en breve se celebrará un consello escolar no que se aprobará unha modificación da partida dos gastos de funcionamento do centro para levar a cabo esta obra, xa que a Xunta de Galicia agora mesmo  non pode por cuestións económicas”.

A este respecto por parte do Concello aportarase a man de obra ademais de encargarse de botar unha placa de formigón na área, con fin de poder anclar con maior seguridade dita cuberta. Pola súa banda o centro escolar contribuirá cunha cuantía económica e os pais e  nais dos alumnos co material preciso. “Ata o momento son arredor de 6.500 euros os que a ANPA leva gastados. Unha cifra superior ós 3.500 euros que según o BNG custaría dita instalación”, asegurou Marín.

Colaboración dos pais e nais
Dende o Goberno municipal ven "normal" que a ANPA pida a colaboración dos pais e nais xa que agora non hai actividades complementarias como festas de fin de curso ou contacontos, polo que parte deste orzamento pódese adicar para contribuir no bo funcionamento dos centros tendo en conta a situación das administracións públicas.

Cabe destacar que no mesmo centro xa se acometeu outra intervención similar diante do edificio de Educación Infantil asumida íntegramente polo Concellode Ordes. Namentres se está a espera de que se leve a cabo unha segunda fase deste proxecto, que a Consellería de Educación se comprometeu a levar a cabo en canto sexa posible.

*