Xesús
Pedreira: “Se trata dun atropelo que van sufrir moitos veciños con
enfermidades crónicas”
O PSOE de Ordes instará mañá
xoves ao pleno municipal a posicionarse contra o copago sanitario aprobado
recentemente polo Ministerio de Sanidade e que afectará a preto de 200
medicamentos dende o vindeiro 1 de outubro.
Os socialistas pedirán o apoio
do resto de grupos municipais para instar ao presidente da Xunta de Galicia a
non adoptar este copago para pacientes con tratamento oncolóxico, hepatites
crónicas, esclerose múltiple e outras enfermidades, cuxos medicamentos lles
eran dispensados sen custo.
Así mesmo, o PSOE de Ordes pedirá que se inste á
ministra de Sanidade a retirar este copagamento ou a dimitir, en caso
contrario.
Melloras no tráfico
Por outra banda, o PSOE ordense
presentará diante do pleno unha batería de pequenas melloras para os veciños e
veciñas de Ordes. Así, solicitará un novo cambio na sinalización horizontal en
Santa Cruz de Montaos, concretamente a reposición da liña descontinua diante do
Hotel Santa Cruz de Montaos.
O cambio feito por Demarcación de Estradas do
Estado en Galicia está a ocasionar perdas económicas a este establecemento, xa
que impide o xiro dos clientes procedentes de Santiago, que teñen que
desprazarse ata Guindiboo para poder xirar.
Así mesmo, os socialistas instarán
ao alcalde a que volva a esixirlle á Deputación o arranxo da rodeira focha na rúa do Recreo, antes de que remate a garantía desta obra.
Os socialistas tamén pedirán o
arranxo dunha farola do parque Pilar Martínez, na zona do Paraíso, que non está
ben suxeita pola base e corre risco de caer.
Ademais, solicitarán a retirada do
antigo escudo de Ordes da fachada da Casa Consistorial e a súa substitución
polo escudo oficial. O escudo que hoxe está na casa consistorial sería
trasladado ao Museo Juanjo Liñares.
 |
| Xesús Pedreira (PSOE). |
As frases de Xesús Pedreira, voceiro municipal socialista de Ordes
“O copago sanitario se trata dun atropelo do Goberno do PP que van sufrir moitos veciños con enfermidades crónicas e do que nos enteramos polo BOE, xa que a ministra de Sanidade ocultouno na súa comparecencia no Congreso dos Deputados”
*
