Pedreira: "Esta estrada está en moi mal estado, con grandes fochas, polo tráfico escesivo que soporta e, sobre todo, polos camións de Sogama"
O Partido Socialista de Ordes solicitou hoxe que se prohíba a circulación de todo tráfico maior de 5,5 toneladas, sobre todo dos camións de Sogama, pola estrada de Mercurín, que vai dende o polígono industrial de Merelle ata Ponte Portigo (no seu tramo ordense). O voceiro municipal do PSdeG-PSOE en Ordes, Xesús Pedreira, explica que “esta estrada está en moi mal estado, con grandes fochas, polo tráfico escesivo que soporta a diario, especialmente de tráfico pesado e, sobre todo, dos camións de Sogama, que como todos sabemos son de gran tonelaxe”.
As obras de mellora na estrada de Mercurín, que une o polígono de Merelle coa localidade de Cerceda, teñen un orzamento de máis de 2,8 millóns de euros procedentes do Plan Miner e foron conseguidas polo Concello de Ordes no ano 2008. O proxecto foi elaborado pola Xunta en 2010 (por un importe de 150.000 euros), polo que só resta a sinatura do convenio entre o Concello de Ordes, a Xunta de Galicia e o Ministerio de Industria, Turismo y Comercio para que poidan adxudicarse as obras.
O retraso na sinatura deste convenio, informa o PSdG-PSOE de Ordes, deteriorou aínda máis un vial que xa se atopaba daquela en malas condicións. Pedreira Mirás asegura que “o mal estado desta vía contribúe a que se produzan accidentes tanto nos propios vehículos polo estado da capa de rodadura como, desgraciadamente, tamén perdas de vidas humanas, sobre todo de peóns, por carecer de beiravía e beirarrúas”. Unha situación que tamén afecta directamente ás arcas do Concello de Ordes pois “ao ser un vial de titularidade municipal, o Concello ten que asumir gran parte deses desperfectos que se producen”, explica Xesús Pedreira.
 |
| O concelleiro socialista Xesús Pedreira Mirás. |
Ante este retraso que xa vai para catro anos, Xesús Pedreira solicitará ao pleno municipal do vindeiro 26 de xaneiro que “se non se asina o convenio, a estrada de Mercurín sexa asumida de inmediato pola Consellería de Medio Ambiente, Territorio e Infraestruturas dado que os veciños de Ordes están a asumir uns gastos por desperfectos nos vehículos que circulan por unha estrada que xa tiña que ter sido arranxada”. Ata entón, e mentres esta estrada sexa de titularidade municipal, o voceiro socialista ordense pedirá que se prohíba a circulación de todo tráfico pesado maior de 5,5 toneladas, salvo aquel que o Concello de Ordes autorice expresamente.
Os traballos de mellora e ensanche desta estrada, de 8,275 metros de lonxitude, teñen un prazo de execución de 24 meses e atravesan os lugares de A Portela, Pedre, O Cruceiro, Bailia e Vilasenín. Na actualidade, o ancho medio desta estrada é de sete metros, dos que só 6 son aproveitables para o tráfico rodado. O novo proxecto contempla ampliar esta estrada ata acadar un ancho total da plataforma de 10 metros, con arcéns de metro e medio a cada lado. Unha nova anchura á que habería que engadir sendas cunetas dun metro de ancho cada unha.
Así mesmo, o proxecto contempla a mellora do firme da estrada, que pasará a ter unha categoría especial para soportar tráfico pesado, e varias actuacións nas cunetas para favorecer a evacuación do auga e impedir o seu taponamento pola maleza.
