martes, 9 de octubre de 2012

A Mancomunidade despídese de Prado Patiño cunha homenaxe

Miguel Prado Patiño, terceiro pola dereita, onte cos alcaldes da Mancomunidade de Municipios de Ordes.

O alcalde de Frades, Roberto Rey, tomou posesión do seu cargo na sesión plenaria ordinaria de onte

Os sete alcaldes da Mancomunidade de Municipios de Ordes participaron na mañá de onte nunha pequena homenaxe que a entidade supramunicipal quixo ofrecer a Miguel Prado Patiño, un dos membros fundadores da Mancomunidade e presidente da mesma entre os anos 2003 e 2011. Un posto que Miguel Prado deixou hoxe logo da súa renuncia como alcalde de Frades, realizada por incompatibilidade coa súa inclusión nas listas electorais ao Parlamento de Galicia polo Partido Popular pola Coruña.

Miguel Prado agradeceu a placa conmemorativa entregada polos seus compañeiros e destacou o traballo da Mancomunidade de Ordes xa que “xuntos podemos optimizar os servizos e prestarlles a mellor atención posible aos cidadáns”. Ao acto asistiron os sete alcaldes da comarca de Ordes: José García Liñares (Cerceda), Roberto Rey Martínez (Frades), Mariano Iglesias Castro (Mesía), Manuel Regos Boquete (Ordes), Manuel Mirás Franqueira (Oroso), Antonio Pereiro Liñares (Tordoia) e Xosé Dafonte Varela (Trazo).

O Pleno da Mancomunidade deu a benvida ao seu novo membro, Roberto Rey Martínez, novo alcalde de Frades.

Un novo membro
Previamente á homenaxe, o pleno da Mancomunidade de Municipios de Ordes celebrou a súa sesión ordinaria de outubro, na que tomou posesión como novo membro o alcalde de Frades, Roberto Rey Martínez. Na sesión acordouse solicitar unha subvención á Consellería de Traballo e Benestar para a contratación dunha axente de emprego e desenvolvemento local.

*