miércoles, 7 de noviembre de 2012

Ordes celebra o día contra a violencia de xénero regalando adornos para a árbore do Nadal

Trátase dunha campaña creada polo CIM da Mancomunidade de Municipios da Comarca

A Mancomunidade de Municipios da Comarca de Ordes realizará, a través do Centro de Información á Muller (CIM) comarcal, un campaña de sensibilización contra a violencia de xénero nos sete concellos da comarca ordense (Cerceda, Frades, Mesía, Ordes, Oroso, Tordoia e Trazo) para conmemorar o 25 de Novembro, Día Internacional contra a Violencia de Xénero. Unha campaña que se complementará cunha serie de actividades programadas polo CIM de Ordes en colaboración cos concellos da comarca e con algunha actuación máis organizada por cada municipio.

Durante os próximos días, a Mancomunidade de Ordes porá en marcha unha campaña de sensibilización contra a violencia de xénero baixo o lema: “25-N, igualdade real”. O CIM de Ordes repartirá entre os sete concellos un total de 4.000 adornos para a árbore de Nadal: un copo de neve branco co lema da campaña. 

Uns adornos que os veciños e veciñas poderán recoller de xeito totalmente gratuíto nos seus respectivos municipios. A acción complementarase cunha serie de carteis informativos nos que se incluirán lemas a prol da igualdade e en contra da violencia.

Así mesmo, a Mancomunidade de Ordes apoiará tamén a campaña “No te saltes las señales. Elige vivir”, promovida polo Ministerio de Sanidad, Servicios Sociales e Igualdad e apoiada pola Federación Española de Municipios e Provincias (FEMP). Unha campaña á que xa se adheriu a web do CIM de Ordes (www.ordessenviolencia.org) e á que se poden adherir tamén os distintos medios de comunicación da comarca (http://www.msps.es/campannas/campanas12/eligeVivir.htm).

Bilbiotecas

Por outra banda, a Mancomunidade de Ordes ten previsto crear un fondo bibliográfico de igualdade a través da Rede de Bibliotecas de Galicia. O obxectivo é poder prestar fondos relacionados con igualdade de xénero (libros, CD´s, vídeos...) ás distintas bibliotecas da comarca, de xeito que poidan ser consultados por calquera veciño ou veciña da comarca de Ordes.

Ademais, o CIM de Ordes participará o vindeiro mércores 21 de novembro como invitado no programa “Encontros na biblioteca”, unha iniciativa organizada polo Concello de Ordes na que participarán alumnos de 4º da ESO do IES Nº1. A biblioteca de Ordes fará unha selección de fondos bibliográficos relacionados coa violencia de xénero e a igualdade, dos que os rapaces lerán algúns parágrafos e debaterán sobre o seu significado. Un debate no que participarán as técnicos do CIM, que lles ampliarán información sobre os distintos temas a debate.

Autoprotección para vítimas
Finalmente, a Mancomunidade de Ordes colabora tamén cos Concellos de Oroso e de Ordes noutras actividades relacionadas coa prevención da violencia de xénero e coa conmemoración do 25-N. Así, Ordes está a acoller dende o pasado 26 de outubro un curso de autoprotección para mulleres vítimas de violencia de xénero, unha iniciativa que promove a Secretaría Xeral da Igualdade en colaboración co Sindicato Unificado de Policía e que inclúe un total de 15 cursos noutras tantas localidades de Galicia. 

*