Manuel Regos: "A violencia de xénero é un problema universal e a súa abordaxe require que as Administracións públicas e a sociedade compartan o sentimento de rexeitala"
A
Mancomunidade de Municipios da Comarca de Ordes vén de poñer en marcha a
campaña “25-N, igualdade real”, que se levará a cabo durante esta semana nos
sete concellos da comarca ordense (Cerceda, Frades, Mesía, Ordes, Oroso,
Tordoia e Trazo) para sensibilizar aos máis de 40.000 veciños da comarca en
materia de igualdade e contra a violencia de xénero. Unha iniciativa
conmemorativa do 25 de Novembro, Día Internacional contra a Violencia de
Xénero, que a Mancomunidade está a realizar a través do Centro de Información á
Muller (CIM) comarcal.
Contido da campaña
Así, o
CIM de Ordes repartiu os carteis informativos e 4.000 figuriñas de Nadal, ambos
coa mensaxe da campaña “25-N, igualdade real”, entre os sete Concellos da
comarca e as outras entidades colaboradoras (xulgados, centros de saúde,
colexios...). O cartel informativo recolle a evolución das actitudes contra a
violencia de xénero: na parte escura recóllense frases relacionadas cos malos
tratos e con falsos mitos existentes sobre a violencia (“aguanto polos meus fillos”,
“borra a este tío dos teus contactos”, “el non é malo, pégame poucas
veces”...); mentres que na parte branca figuran actitudes e posicionamentos
contra a violencia de xénero e a prol da igualdade entre homes e mulleres (“non
tes por que vivir con medo”, “non ten dereito a tratarte mal”, “non todos os
homes son iguais”...).
 |
| Manuel Regos Boquete. |
As frases de Manuel Regos, presidente da Mancomunidade de Ordes
“A violencia de xénero é un problema universal e a súa abordaxe require que as Administracións públicas e a sociedade compartan o sentimento de rexeitar a violencia de xénero en calquera das súas manifestacións”
“Co obxectivo de difundir unha mensaxe homoxénea de sensibilización contra a violencia de xénero e a prol da igualdade de oportunidades entre homes e mulleres, dende a Mancomunidade decidimos tamén enviar esta campaña aos xulgados, aos postos da Garda Civil, á Oficina do INEM, aos centros de saúde e aos centros educativos da comarca de Ordes”
*
