1.- DESTRUCIÓN DE EMPREGO. A destrución de emprego avanzou de xeito
imparábel desde o inicio da actual crise económica. As políticas emprendidas
agravaron aínda máis a situación de miles de persoas no noso país, ao tempo que
protexen aos verdadeiros culpábeis da actual desfeita económica e social.
2.- DECISIÓNS POLÍTICAS. 100.000 persoas máis ficaron sen emprego
en Galiza neste período de crise económica, superando xa as 267.000, un 20 por
100 da poboación activa. As decisións políticas que se están a adoptar están a
ter unha influencia decisiva no empeoramento das condicións de vida das
maiorías sociais. Cada nova “reforma” supón un recorte en servizos
públicos e un retroceso en conquistas sociais.
3.- DEMOCRACIA. A democracia tamén está a ser abatida co
pretexto da crise. Cada vez é máis evidente que se goberna en institucións e
organismos afastados, que non están sometidos ao referendo popular. Quen decide
realmente non ten que dar contas, e os gobernos que son escollidos en procesos
electorais, simplemente se adican a cumpriren os mandatos, sen atreverse a
retrucar ningunha das imposicións dos grandes poderes financeiros que
perseguen. Os Gobernos do PP en Madrid e Galiza coidan non só de que a crise
non afecte a ditos poderes, senón tamén para que a paguen as maiorías sociais,
asumindo restricións, pagando indiscriminadamente máis impostos para sanear os
balances da banca privada.
4.- POLÍTICA ECONÓMICA. O FMI, o BCE, a UE, deseñan a política
económica. Rajoy e Feijoo limítanse a executar, aplicando receitas fracasadas,
ineficaces, que sitúan xa a unha ampla maioría de persoas a carón do abismo,
sen traballo nin rede social de cobertura.
5.- CENTROS DE DEICSIÓN. Canto máis se alonxan os centros de
decisión, máis inxustas son as políticas adoptadas, máis se agudiza a crise
económica.
6.- EMPREGO. Saír da crise económica para moitas
galegas e galegos significa poder ter un traballo. E poder xerar emprego para
eses miles de persoas que aspiran a telo só poderá vir da man de reactivar os
sectores produtivos básicos da nosa economía, para o que precisamos ter maior
capacidade de decisión en Galiza para darlles apoio e orientalos polo camiño
dun desenvolvemento sustentábel.
*
