O alcalde asegura que este convenio de 106.536 euros foi posible "logo de moitas reclamacións, solicitudes, demandas e negociacións emprendidas polo equipo de Goberno municipal de Ordes"
O alcalde de Ordes, Manuel Regos, tildou onte de "manipulación
informativa" as declaracións feitas polo portavoz municipal do PP de Ordes, José Luis Martínez Sanjurjo, nas que se acusa ao actual equipo de
Goberno municipal de "sumir no abandono ás pistas e tramos circulatorios de titularidade
municipal". Segundo o alcalde, se trata de "falsas acusacións" verquidas co gallo da recente aprobación
dunha subvención de 106.536,87 euros destinada ao arranxo do vial que une Mesón do
Vento coa estrada de Buscás. Partida orzamentaria incluída dentro dos Proxectos Estratéxicos de Infraestruturas no Medio Rural (PEIM), programa desenvolvido pola Xunta de Galicia en colaboración co Ministerio de Agricultura, Alimentación e Medio Ambiente.
Segundo sinalou o alcalde, “o noso compromiso co mantemento das
infraestructuras e dos viais deste Concello tennos levados incluso a investir e
facer arranxos en tramos que non son da nosa competencia, como por exemplo os da
estrada que une Ordes con Cerceda”. Precisamente, apunta "fun eu, o alcalde, o encargado de asinar o pasado mércores o convenio
que fará posible, grazas a fondos europeos, o investimento citado no tramo
Mesón do Vento – Buscás". Regos Boquete asegura que este convenio foi posible "logo de moito tempo de reclamacións,
solicitudes, demandas e negociacións emprendidas por este equipo de Goberno”.
Plan de bacheado
Actualmente o Concello de Ordes mantén operativo o
seu propio plan de bacheado co que se persegue dar solución a cuestións de
mantemento e mellora do firme. “Un plan que se sufraga or orzamento municipal e
que é máis necesario ca nunca, xa que a actual crise económica provoca que en
moitos casos organismos e administracións demoren o seu investimento neste tipo
de obras”, explica o alcalde. O propio alcalde tamén lamenta e oponse ao comportamento de partidos que como o PP de Ordes, “están sempre pendentes de empregar calquer
asunto, incluso aqueles que resulten beneficiosos para o pobo de Ordes como a
sinatura deste convenio, para facer unha crítica política negativa que en nada
favorece ao noso municipio e a súa imaxe".
"O
compromiso de Manuel Regos e o seu equipo en materia de melloras das redes de
comunicación do Concello de Ordes -asegura o Goberno municipal en nota de prensa-, ten o seu máximo expoñenente na recentemente
inaugurada rolda leste". Un tramo que ven a permitir o tránsito fluido de
circulación polo centro da vila grazas á posibilidade que ofrece de poder
desviar os camións e tráfico pesado da N-550.
 |
| Manuel Regos, alcalde de Ordes. |
Esforzos do Goberno de Ordes
“Tendo en conta o inxente esforzo
feito polo Concello en investimentos coma este resulta canto máis sorprendente
que aínda se atrevan a falar de deixadez pola nosa parte neste tipo de
materias”, manifesta Regos.
En relación ás mocións presentadas polos demais
partidos en diversos plenos, Manuel Regos quixo tamén lembrar que “a actitude do
Goberno municipal sempre foi a de votar a favor daquelas decisións e posturas que repercutiran en beneficio da
seguridade, comodidade e desenvolvemento económico dos veciños e veciñas, tanto
de Buscás como de calquera outra parroquia do noso municipio”.
*
