Castro: "Perto de tres mil pensionistas se verán afectados en Ordes"
Gonzalo Castro, portavoz do BNG
de Ordes, anunciou hoxe que os nacionalistas proporán que o Pleno de Ordes inste á Xunta de Galicia a que suprima o copago farmacéutico
para as persoas pensionistas. Castro afirmou que “o
copago farmacéutico é un sistema inxusto e insolvente, porque quedan fóra de
financiamento medicamentos fundamentais que non teñen alternativa en Galiza,
nin nas farmacias nin nas distribuidoras, o que ten provocado que persoas con
tratamentos crónicos deixaron de retirar a súa medicación pola imposición deste
copago”.
Castro salientou que en Ordes “perto
de tres mil pensionistas se verán afectados en Ordes por esta medida, que tamén
aumenta a aportación de miles de persoas activas”.
O portavoz do BNG afirmou que “as
persoas obrigadas ao copago farmacéutico poideron xa comprobar desde un
primeiro momento como a realidade do recorte as afectaba gravemente. De feito
pensionistas con persoas que dependen da súa cartilla, tiveron que soportar un
forte incremento das aportacións”.
Medidas lesivas
Gonzalo Castro fixo fincapé en
que “esta medida non se implantou por igual en todo o territorio do Estado xa
que algunhas comunidades autónomas elaboraron normativas propias grazas ás
competencias que teñen atribuídas, compensando esta medida tan lesiva e
evitando que as persoas pensionistas vexan reducidas as súas pensións polo
feito de ter enfermidades, obrigadas a contribuír ao pago do rescate á banca
privada española”.
O portavoz municipal afirmou que “o
Concello de Ordes debe defender aos seus veciños diante destas gravísimas
medidas, por iso debe instar ao Goberno da Xunta de Galiza a que desenvolva
unha normativa propia, en virtude das competencias sanitarias que lle atribúen
as leis galegas e o Estatuto de Galiza, para reducir o impacto da medida
imposta polo Goberno do Estado nas economías familiares”.
*
