Pídenlle a Núñez Feijóo que non permita a distribución francesa e alemá
O pleno da Mancomunidade de Municipios da Comarca
de Ordes, reunido de forma extraordinaria e urxente, aprobou unha moción de
apoio ao sector lácteo galego presentado polos sindicatos Unións Agrarias,
Xóvenes Agricultores e Sindicato Labrego Galego. O presidente da Mancomunidade
de Ordes, Manuel Regos Boquete, sinalou que “despois de reunirnos cos
sindicatos, e a petición deles, convocamos un pleno para darlles o respaldo
total da Mancomunidade ás medidas que propoñen para tratar de paliar a
situación crítica do sector lácteo tanto en Galicia como na nosa comarca e que
afecta ao futuro das explotacións gandeiras e a un importante número de postos
de traballo autónomos ligados a esta actividade”.
Unha moción que foi respaldada polos sete
alcaldes da comarca de Ordes, presentes na reunión: José García Liñares (Cerceda), Miguel Prado Patiño (Frades), Mariano
Iglesias Castro (Mesía), Manuel Regos Boquete (Ordes), Manuel Mirás Franqueira
(Oroso), Antonio Pereiro Liñares (Tordoia) e Xosé Dafonte Varela (Trazo). Todos
eles fixeron fincapé na importancia que o sector lácteo ten nos seus
respectivos municipios e na necesidade de traballar conxuntamente para garantir
un futuro para a gandeiría de leite en Galicia.
Os alcaldes da comarca
compartiron a análise realizada polos tres sindicatos, que aseguran que “o
rural de Galicia está a afrontar un tempo de incertezas económicas agravado en
boa medida polo importante diferencial de prezos do leite con España e Europa.
Unha situación que se veu agravada pola suba dos custos de produción, a seca
que vivimos a última primavera, a vaga de incendios, a falta de axudas a
explotacións e a redución e práctica desaparición das compensatorias dos danos
producidos pola fauna salvaxe”.
Petición a Feijóo
Por todo isto, a Mancomunidade
de Ordes solicitará ao presidente da Xunta, Alberto Núñez Feijóo, que esixa aos
Ministerios de Agricultura e Economía que non permitan que a distribución
francesa e alemá nos trate como o sumidoiro para a súa produción láctea a costa
de arruinar zonas produtoras como Galicia; e a que, no exercicio das súas
responsabilidades, tome as iniciativas oportunas para impedir a discriminación
de prezos que as empresas exercen sobre o leite galego, articulando mesas de
negociación entre productores, industria e distribución semellantes as que se
deron en paises vecinos como Francia.
E é que os gandeiros galegos son
os que recibn un prezo máis baixo polo seu leite de toda España. Segundo datos
do Fondo Español de Garantía Agraria (FEGA), en maio de 2012 os gandeiros
galegos recibiron 29,2 euros/100 litros, é dicir, un 5,5% por debaixo da media
estatal e ata un 15,61% por ebaixo do que percibiron os gandeiros valencianos.
Ademais, o prezo percibido polos gandeiros galegos é un 5,48% inferior ao de
Portugal, un 5,65% inferior ao de Alemaña e un 12,16% inferior ao de Holanda.
Ademais, a Mancomunidade de
Ordes instará ao presidente autonómico a que cumpra co acordado na reunión da
Mesa do Leite do pasado 5 de xuño, no sentido de trasladarlle ao Goberno do
Estado a necesidade dunha política urxente e contundente que impida o
estrangulamento financeiro do sector lácteo. Así, os gandeiros propoñen:
 |
| Manuel Regos Boquete. |
A posta en marcha dun observatorio de precios das materias primas, que permita valorar a súa evolución de xeito transparente.
Que formule nas instancias que
corresponda e con urxencia, as modificacións normativas que aseguren unha
aplicación axeitada dos contratos no sector lácteo. A pesar do inmediato destes
cambios, algunhas cuestións legáis están pendentes de regular, tales coma os
criterios de fixación do volume nos contratos ou a necesidade de regular a
figura do mediador con capacidade de resolver discrepancias entre produtores e
industria.
Que traslade á Consellería do Medio
Rural a necesidade de reforzar as partidas de axudas á modernización das
explotacións e, sobre todo, que actúe de xeito decidido contra o déficit de
térra que padecen as explotacións galegas, que está a limitar a rendibilidade
das mesmas e a comprometer o futuro das axudas europeas que estarán ligadas á
superficie agraria.
*
