viernes, 19 de abril de 2013

O PSOE de Ordes pide a reposición da sinalización horizontal na vila de Ordes


Os socialistas advirten dos riscos para a seguridade viaria da mala sinalización dos pasos de peóns

O PSOE de Ordes pide a reposición da sinalización horizontal na vila de Ordes, especialmente dos sinais de paso de peóns que nalgúns puntos de Ordes apenas son visibles para os condutores. O concelleiro socialista Xesús Pedreira advirte dos “riscos para a seguridade viaria dos veciños da mala sinalización dos pasos de peóns nas distintas rúas da vila de Ordes, o que supón un problema tanto para os condutores como, especialmente, para os peóns”.

Por iso, os socialistas pedirán na vindeira sesión plenaria do 25 de abril que o pleno inste tanto ao Concello como á Deputación, á Xunta de Galicia e á Administración Central a proceder á reposición da sinalización horizontal naquelas vías da Vila de Ordes que sexan da súa titularidade. 

Parroquias
“Habería que actuar sobre outras máis nas parroquias, pero as máis estropeadas e sobre as que urxe unha actuación son as da Vila de Ordes”, apunta Pedreira Mirás, quen lembra que “agora que chega o bo tempo poderían facerse sen ningún atranco”.

A maiores, os socialistas pedirán tamén que o Pleno Municipal inste ao Concello de Ordes a incrementar a vixilancia sobre os estacionamentos sobre liña amarela, como acontece a diario na rúa Alfonso Senra. 

“Estes vehículos provocan molestias e retencións no resto de condutores e nalgúns puntos mesmo restan visibilidade aos condutores, pudendo ser causa de accidentes”, explica Xesús Pedreira. Por iso, os socialistas pedirán que se inste á Policía Local a incrementar a vixilancia sobre a zona ou se adopte outra solución que evite este tipo de estacionamentos ilegais.

*