O PP de Ordes observa unha "obstrucción deliberada" do
Concello á tramitación do PXOM e avoga por un documento "transparente e sen
favoritismos"
O Partido Popular de Ordes afirmou hoxe que o Concello de Ordes "continúa
ocultando" aos grupos da oposición as modificacións efectuadas no documento de
inicio do PXOM, logo do milleiro de suxestións efectuadas polos propietarios
afectados. De feito, no vindeiro pleno municipal, o Partido Popular solicitará
copia do documento remitido no seu momento á Xunta de Galicia e que serviu de base para a
elaboración do informe previo á aprobación inicial do PXOM ordense.
“Ordes ten un Goberno local
opaco que se nega a desenvolver unha xestión transparente do PXOM, provocando
así que a sombra da dúbida se instale sobre un documento vital para o futuro do
municipio, e que debería tramitarse coa máxima dilixencia, sen favoritismos e
sen máis limitacións que a de responder ao interese xeral, en lugar de velar
polos intereses particulares que tanto preocupan a Manuel Regos”, afirma José Luis
Martínez Sanjurjo, portavoz municipal do Partido Popular.
"Tutela permanente"
Martínez Sanjurjo lamenta que
durante o proceso de elaboración do documento
de inicio do PXOM, o alcalde de Ordes "adoptase unha actitude de tutela
permanente, se cadra para tratar de recualificar determinadas fincas, aínda que
fose a costa de incumprir as instruccións e directrices de ordenación do
territorio".
Así, continúa Martínez Sanjurjo, "os cinco anos perdidos polo
actual alcalde de Ordes para dotar a este Concello dun Plan Xeral de Ordenación
Municipal transparente e con visión de
futuro, poñen de manifesto unha obstrucción deliberada do rexedor á aprobación
deste instrumento de planeamento".
Recordan os populares ordenses
que ao inicio da pasada lexislatura local, cinco anos atrás, o alcalde de Ordes "optou por tirar pola borda o documento inicial do PXOM que herdara do anterior executivo
local e ao que só restaban por corrixir as deficiencias sinaladas pola Xunta".
De terse continuado aquel proceso, aseguran os populares, Ordes disporía, a día de hoxe, de un PXOM en
vigor ou próximo a aprobarse, como acontece noutros concellos da comarca.
Novo PXOM
Pola contra, a decisión do
rexedor local de iniciar a elaboración dun novo PXOM, "partindo de cero, e sen
argumentos sólidos que xustificasen tal decisión, condenou o futuro de Ordes e
dos ordenses que, a este ritmo, seguramente seguirán sen PXOM definitivo no que
resta de lexislatura municipal".
A xuízo de Martínez
Sanjurjo, os retrasos que acumula o
Concello de Ordes na tramitación do PXOM contrastan coa rapidez coa que a Xunta de Galicia emitiu o informe previo á aprobación inicial do PXOM ordense, xa que este
documento foi elaborado no prazo máximo de dous meses fixado pola lei para esta
primeira fase de tramitación.
*
