 |
| Momento do pleno da Mancomunidade de Municipios de Ordes. |
Tamén reclaman á Xunta unha reforma da Administración de Xustiza
O pleno da Mancomunidade
de Municipios da Comarca de Ordes acordó o pasado martes e por unanimidade dirixirse ao Goberno
de España para solicitarlle a retirada do Anteproxecto de Lei Orgánica do Poder Xudicial, mediante o cal desaparecería o partido xudicial de Ordes.
Na moción presentada,
e que coincide coa tamén aprobada no pleno municipal ordense do pasado mes de
abril, tamén se reclama unha reforma da organización da Administración de Xustiza coa inclusión da transferencia da competencia exclusiva a Galicia na
dita materia.
Por outra banda, reclámase á Xunta de Galicia a que manifeste a
súa oposición á implantación dos tribunais de instancia provincial, á supresión
dos partidos xudiciais nas vilas que son cabeceiras de comarca e que demande a
retirada do Anteproxecto de lei.
Tamén a que inicie os trámites para a
solicitude das competencias para a demarcación e organización xudicial galega. Por último destácase a creación dun
grupo de traballo para definir o mellor modelo segundo as peculiaridades e
características demográficas, sociais e territoriais de Galicia.
Un grupo
no que terían presenza representantes
dos grupos parlamentarios, dos concellos, das organizacións representativas de
todos os operadores xudiciais e que serviría como base para a negociación co
Goberno de España.
Por outra banda, e tamén
co acordo dos sete alcaldes da comarca, aprobouse instar ao Ministerio de
Fomento e á Axencia Estatal de Seguridade Aérea (AESA) a que se teña en conta o
Solo de Núcleo Rural como Núcleo Urbano Consolidado.
Con iso evitaríase a
dilatación do tempo para a concesión de licenza de cara a obras de menor
envergadura en bens inmobles, xa que dende a entrada do Real Decreto 297/2013
todos os expedientes de obras que se atopen dentro da servidume aeronáutica do
aeroporto de Santiago de Compostela deberán ser remitidos a AESA.
Outras das medidas
adoptadas na sesión que tivo lugar onte foi a solicitude á Xunta de Galicia de
dúas subvencións por valor de 37.600 e 20.000 euros para a continuación do
Programa de Fomento ao Cooperativismo e para o Servizo de Normalización
Lingüística, respectivamente.
*
