Xesús Pedreira: "Non é de recibo que cada vez que se produza teñamos que instar ao Concello a que tramite as reclamacións diante de Gas Natural-Unión Fenosa ou da Xunta de Galicia"
O PSOE de Ordes presentará unha moción na sesión
plenaria do vindeiro 30 de xaneiro para esixirlle ao Concello de Ordes a
elaboración dun protocolo de actuación diante dos cortes do subministro
eléctrico que se producen no municipio cada vez que empeora o tempo e que tivo
o seu cumio na cicloxénese explosiva do pasado 23 de decembro.
Os socialistas
consideran que ese episodio demostra “a necesidade que ten un Concello como o
de Ordes de ter un protocolo de actuación definido á hora de atender e
encabezar as xustas reclamacións dos seus veciños”, sinala Xesús Pedreira,
secretario xeral dos socialistas de Ordes.
Os socialistas ordenses entenden que, a maiores, o Concello
de Ordes debe informar e asesorar aos veciños e veciñas que sufriron algún dano
por mor do corte do subministro ou pola subida da tensión cando se restablece o
servizo.
“Deste xeito non ralentizariamos todo o procedemento, como acontece na
actualidade”, conclúe o voceiro dos socialistas ordenses
 |
| Xesús Pedreira (PSOE). |
As frases de Xesús Pedreira, voceiro municipal do PSOE de Ordes
“Non é de recibo que cada vez que se produce un
caso semellante teñamos que instar ao Concello de Ordes a que actúe e tramite
as reclamacións dos veciños diante de Gas Natural-Unión Fenosa ou da Xunta de
Galicia"
"Entendemos que iso é algo que ten que quedar establecido como un
protocolo de actuación, cunhas follas de reclamacións dispoñibles para a
veciñanza”
“Tal e como durante a pasada lexislatura o Concello de Ordes
se puxo á fronte das reclamacións de veciños, comerciantes e empresarios polos
microcortes de luz que se producían no municipio, agora debe tomar tamén a
decisión de encabezar as xustas reclamacións dos seus veciños cada vez que se
producen situacións como a da pasada Noiteboa, que cada vez son máis
frecuentes”
*
