Pedreira: “No pleno do 25 de abril defendín que o máis axeitado era que esa dimisión estivese vencellada á apertura dun xuízo oral"
"A fin de que se mantivese a unanimidade, votei a favor. Hoxe manteño ese voto por simple congruencia"
O PSOE de Ordes votou esta mañá en contra da
proposta do alcalde Manuel Regos para modificar o acordo do Pleno celebrado o
pasado 25 de abril, que recolle que todos os membros da corporación municipal
asumen o compromiso ético de dimitir de xeito inmediato do seu cargo de
concelleiro/a se son imputados nun proceso penal por actividades relacionadas
co exercicio do seu cargo.
O voceiro socialista, Xesús Pedreira, explica que
“no pleno do 25 de abril defendín que o máis axeitado era que esa dimisión
estivese vencellada á apertura dun xuízo oral, pero quedei só nesta
argumentación xa que o resto dos grupos municipais, incluído o Grupo de
Goberno, rexeitaron esa opción.
A fin de que se mantivese a unanimidade, votei
a favor. Hoxe manteño ese voto por simple congruencia: non podemos votar unha
cousa hai dez días e hoxe outra diferente, por moitos matices que se lle
queiran dar”.
Código ético
Por iso, Pedreira Mirás mantén a petición
realizada nesa mesma sesión plenaria de introducir un Código Ético do
Concelleiro no Regulamento de Organización e Funcionamento do Concello de
Ordes. O voceiro socialista considera que “se todos os grupos municipais somos
quen de aprobar un código de obrigado cumprimento, que podería estar escrito
antes do vindeiro pleno ordinario, teríamos estipuladas de xeito claro e
preciso as causas e o procedemento a seguir no caso dunha imputación dun
concelleiro”.
*
