A concelleira do BNG de Ordes, Montserrat Rei,
afirmou onte que o alcalde, Manuel Regos pretende aprobar no Pleno que se celebrará mañá, “a renuncia do Concello de Ordes a impulsar e
promover o polígono industrial de Pardiñas”.
Rei salientou que “o alcalde propón para este
Pleno modificar o sistema de xestión do hipotético polígono industrial de
pardiñas, eliminando a participación da administración pública e deixando
exclusivamente á iniciativa privada a súa promoción e desenvolvemento”.
Montserrat Rei, afirmou que “o BNG propuxo na
comisión de urbanismo que se asegurase a participación pública na promoción do
polígono, para garantir o acceso ás parcelas con prezos asequíbeis e evitando a
especulación, mais o alcalde negouse a contemplar esta iniciativa do BNG”.
A concelleira nacionalista acusou ao alcalde de
Ordes “de liquidar definitivamente a posibilidade de ampliar o solo industrial de
Ordes con prezos asequibles cun polígono industrial na zona de Pardiñas”.
Retraso do PXOM
Rei afirmou que “o alcalde estivo enganando aos
veciños de Ordes coa promesa electoral dun novo polígono, cando non fixo nada
para impulsala como o demostra o retraso deliberado da tramitación do novo
PXOM, e agora pretende eludir as súas responsabilidades pasándolle a pelota aos
propietarios dos terreos”.
A concelleira do BNG finalizou facendo
fincapé en que “o alcalde renuncia a levar a cabo un proxecto que podería
atraer novas empresas e actividades ao noso concello, condenando a Ordes a
seguir soportando unha das cifras de desemprego máis altas da provincia da
Coruña, con máis de 1.270 desempregados rexistrados”.
*
