A proposta dos nacionalistas inclúe, entreo outras, unha bonificación do IBI nas vivendas habitadas e unha suba do imposto nas deshabitadas
O
portavoz municipal do BNG de Ordes, Ramiro Recouso, anunciou hoxe que os nacionalistas ordenses defenderán,
na Comisión de Contas e Facenda que se celebra mañá venres, as propostas que
levaron ao Pleno do pasado mes de setembro, proporán diversas medidas para paliar a
desproporcionada suba do Imposto de Bens Inmobles (IBI) acometida no Concello
de Ordes, que se ten visto afectado por unha revisión catastral que elevará nun
50% de media do citado imposto.
En aras de acadar
un consenso entre todos os grupos, o BNG accedeu a debater a modificación da
Ordenanza Fiscal reguladora do IBI, na a Comisión de Contas e Facenda.
Bonificacións
A proposta do BNG
de Ordes inclúe unha bonificación do IBI nas vivendas habitadas e unha suba do
imposto nas deshabitadas, co obxectivo de “favorecer ás persoas que compran un
inmóbel para destinalo a vivenda habitual, fronte ás operacións puramente
inversionistas ou especulativas”, segundo afirmou Ramiro Recouso.
Outra das
propostas do BNG consiste no establecemento de bonificacións no IBI a pagar por
desempregados ou persoas con pensións baixas, algo “de xustiza social”, en
palabras de Ramiro Recouso.
Tamén se propón
desde o BNG que “as vivendas rurais sen servizo público de abastecemento de
auga potábel e saneamento vexan bonificado o seu IBI, en aras de evitar unha
discriminación coas que si gozan destes servizos e que actualmente tributan
todas por igual.”
Pago fraccionado
O BNG proporá
tamén que se estableza “un pago fraccionado do IBI en 3 prazos cuadrimestrais,
para paliar na medida do posíbel o quebranto que para as economías familiares
ten a suba deste imposto”, segundo manifestou o portavoz do BNG de Ordes.
Finalmente, Ramiro
Recouso afirmou que proporemos que “se bonifique o IBI das explotacións
agrarias do Concello, no máximo permitido pola lei, dado que co modificación do
IBI, aprobada por UxO, PSOE e CideGa no pasado mes de xuño, viron incrementadas ostensiblemente
as súas cotas tributarias de IBI”
O voceiro do BNG,
lamenta a falta de sensibilidade do alcalde, Manuel Regos, para cos seus
concidadáns, dado que UxO non presentou ningunha iniciativa para paliar os
efectos da suba do IBI.
*
