O alcalde asegura que trátase dun "erro informático" que a Deputación lle trasladou a Facenda
Pedreira: "O IBI resulta especialmente inasumible nestas explotacións do sector primario"
O PSOE de Ordes afirmou hoxe en nota de prenda que o secretario xeral da
Agrupación Socialista, Xesús Pedreira, conseguiu que o Goberno
municipal habilite unha oficina específica para atender as reclamacións dos
numerosos afectados polos erros nos recibos do Imposto de Bens Inmobles (IBI),
que estes días os veciños están recibindo nas súas casas con cantidades
desorbitadas ou cunha calificación equivocada do ben inmoble ao que se lle
aplica o imposto.
Pedreira reuniuse esta mesma
mañá co alcalde de Ordes, Manuel Regos, para emprazalo a solucionar con
urxencia esta cuestión.
O rexedor explicoulle ao edil socialista que os
problemas cos recibos se deben a “un erro informático na información que a
Deputación da Coruña lle trasladou a Facenda sobre a nova ponencia de valores
catastrais do municipio, á súa vez preparada por unha empresa contratada pola
administración provincial”.
Ante esta situación, os
socialistas recoméndanlles aos veciños que acudan á oficina específica, que
desde mañá mesmo recollerá e tramitará as reclamacións, se observan calquera
anomalía nos seus recibos, tanto nas contías que se lles pretenden cobrar como
na cualificación dos seus bens.
Explotacións agrícolas e gandeiras
Por outra parte, Xesús Pedreira
constatou no encontro desta mañá que o Goberno local aprazou ata o vindeiro ano
a aplicación dunha bonificación do 95%, o máximo que permite a lei, no IBI das
explotacións agrícolas e gandeiras.
Os socialistas ordenses consideran que o Goberno incumpre deste xeito o seu compromiso, adquirido no pleno municipal do
pasado mes de xuño a raíz dunha proposta formulada polo propio grupo municipal
do PSOE.
 |
| Xesús Pedreira (PSOE). |
As frases de Xesús Pedreira, voceiro municipal socialista de Ordes
"O IBI resulta especialmente
inasumible nestas explotacións do sector primario, xa que polas características
especiais das súas construcións, con amplas superficies cubertas, teñen unha
base impositiva maior"
"A eso hai que engadir a crise estrutural do sector
leiteiro, con prezos que practicamente non cobren os custos de produción"
“Se o
Concello lles aplica o IBI nas condicións nas que lles están chegando estes
días os recibos, non fará outra cousa que darlles a puntilla a moitas
explotacións que están loitando pola supervivencia, nun sector que é
fundamental para o municipio”
*
