Montaos, Mesón do Vento, Leira e Vila de Ordes, as poboacións máis afectadas
Pedreira: "Non podemos consentir que veciños do Mesón do Vento se vexan obrigados a trasladarse ata Carral para ir coller o autobús"
O PSOE de Ordes denunciou hoxe os
problemas que lles están a ocasionar aos veciños e veciñas do municipio a
reiterada falta de puntualidade e a redución de servizos no transporte de
viaxeiros por estrada entre Ordes e Santiago.
Facéndose eco das numerosas
denuncias recibidas, os socialistas ordenses presentarán unha moción no pleno
deste xoves para esixirlle á Dirección Xeral de Mobilidade que obrigue á
empresa concesionaria a cumprir os horarios establecidos e que acelere a
entrada de Ordes no Plan de Transporte Metropolitano de Galicia, de xeito que
poda asinarse o convenio de adhesión antes de rematar o 2013.
Tamén os socialistas ordenses instarán ao alcalde, Manuel Regos, a que se comprometa a tramitar as reclamacións dos usuarios diante da Xunta Arbitral de Transportes de Galicia mentres non se solucionen os problemas de mobilidade que afectan aos veciños e veciñas de Ordes.
 |
| Xesús Pedreira (PSOE). |
As frases de Xesús Pedreira, voceiro municipal socialista de Ordes
“Un importante número de veciños, sobre todo do
Mesón do Vento, da Vila de Ordes, de Leira e de Santa Cruz de Montaos,
denuncian a falta de puntualidade horaria e a redución das frecuencias no
servizo de transporte de viaxeiros entre Ordes e Santiago"
"Esta situación está
a ocasionarlles importantes molestias, especialmente no ámbito laboral, xa que
moitos están a chegar tarde aos seus traballos por culpa dun transporte
deficiente”
“No traxecto Coruña-Santiago, algúns dos
servizos que se tiñan que facer por estrada estanse a facer pola AP-9 ata
Ordes, polo que localidades como Mesón do Vento ou Leira quedan sen servizo. E
o mesmo pasa co traxecto Santiago-Coruña, no que se fai por autoestrada o
camiño ata Ordes, quedando os veciños de Santa Cruz de Montaos sen servizo de
autobús”
“Hoxe é máis necesario ca nunca que Ordes entre a formar parte do Plan
de Transporte Metropolitano, pois non podemos consentir que veciños do Mesón do
Vento se vexan obrigados a trasladarse ata Carral para ir coller o autobús”
*
