Xesús Pedreira: "A solución pasaría por instalar un ascensor adaptado"
A Agrupación Socialista de Ordes denunciou esta mañá a existencia de dous informes técnicos que desaconsellan por motivos de seguridade a reinstalación do salvaescaleiras do CEIP Castelao, que causou un accidente moi grave en setembro de 2011 e que estivo a piques de costarlle a vida a un alumno do centro. Os documentos aconsellan a instalación dun ascensor adaptado para solventar os problemas de movilidade no centro escolar. Uns informes realizados a instancias do rogo presentado polo concelleiro socialista Xesús Pedreira no pleno municipal celebrado o pasado 26 de xaneiro e que “recollen o sentir da comunidade educativa do CEIP Castelao”.
“Os informes técnicos, elaborados pola arquitecta técnica municipal e por un arquitecto externo, coinciden en sinalar que a solución máis aconsellable dende un punto de vista técnico é a colocación dun ascensor adaptado e a retirada do salvaescaleiras existente por motivos de seguridade”, explica Xesús Pedreira. O concelleiro socialista pídelle á Consellería de Educación que “se non quere escoitar as xustas demandas da comunidade educativa e do Pleno Municipal de Ordes, cando menos faga caso dos informes técnicos desfavorables e obre en consecuencia”.
Xesús Pedreira lembra que a instalación dun ascensor no CEIP Castelao é un proxecto que procede da época do bipartito na Xunta e que conta co apoio tanto do Consello Escolar como dos pais e nais do centro escolar.
 |
| Xesús Pedreira. |
“Este ascensor podría ser empregado non só polo alumno que sufriu ese desgraciado accidente, senón tamén por calquera alumno que presente algún tipo de diversidade funcional”
“Colocar un ascensor solucionaría o problema de maneira real e evitaría malgastar os cartos de todos nun aparato que non vai ser empregado por ninguén, xa que que o único neno que o empregaba non o quere utilizar dado o medo extremo que ten e polas secuelas psicolóxicas que lle quedaron a raíz das lesións que tivo”
