O PP quere coñecer os informes técnicos dos danos estructurais da antiga Casa do Concello

José Luis Martínez Sanjurjo pide a Manuel Regos e Roberto González que "den a cara"

O Partido Popular de Ordes reclamou o pasado venres ao Concello que faga públicos todos os informes técnicos relacionados cos danos estruturais detectados na antiga Casa Consistorial como consecuencia das obras de remodelación acometidas nos últimos meses. O Grupo Municipal do PP esixe ao alcalde, quen recoñeceu a existencia dun "serio dano" na estructura do edificio, que facilite toda a información sobre os danos que presenta o edificio e pide que se extremen as precaucacións para evitar calquera tipo de dano sobre as persoas.

O Partido Popular de Ordes considera que a remodelación da antiga Casa Consistorial, xunto coa construcción dun novo edificio para o Concello de Ordes, ou a rehabilitación da  estación da Pontraga (propiedade do ADIF, ao que o Concello paga un alugueiro mensual) son algúns exemplos das obras innecesarias acometidas polo equipo de Manuel Regos nos últimos anos, mentres que servizos esenciais para os veciños, como o alumeado público, o arranxo e mantemento de viais ou a simple limpeza de cunetas están desatendidos por falta de orzamento.

José Luis Martínez Sanjurjo considera que, de confirmarse calquera neglixencia no proxecto, o sucedido na antiga Casa Consistorial suporía unha “chapuza descomunal” que non lle pode salir de balde ao equipo de Goberno e reclamará responsabilidades políticas "con todas as súas consecuencias".

A frase de José Luis Martínez Sanjurjo, portavoz municipal do PP de Ordes

“Nin o alcalde nin o concelleiro de obras se poden ir 'de rositas' e deben dar a cara logo da sucesión de chapuzas ás que nos teñen acostumados en Ordes desde a pasada lexislatura”

*