 |
| Manuel Regos, alcalde de Ordes. / Arq. |
"Existen unha ruta alternativa que é coller da ronda leste con destino ao Mesón do Vento", asegura o rexedor
O Goberno municipal ven de informar que o alcalde de Ordes vén de
reiterar unha vez máis a “innecesidade de que o tráfico pesado a partir de 5,5 toneladas que se dirixe tanto á planta de tratamento de Sogama como ao vertedoiro da
Areosa atravese o casco urbano de Ordes”.
Regos insiste “na existencia dun
itinerario alternativo marcado polo Concello de Ordes e que no seu día xa se
puxo en coñecemento dos profesionais e das administracións afectadas polo corte
da estrada de Mercurín”.
Unha decisión acordada no pleno municipal da pasada
semana como consecuencia do gran deterioro que presenta a dita estrada,
pendente dun investimento de arredor de 2.300.000 euros, concedido no ano 2009
a través do Plan Míner.
“Calquera destes vehículos pode coller a
Rolda Leste para enlazar co polígono industrial de Merelle e coa N-550 ata
chegar ao Mesón do Vento, o cal evitaría que os veciños e veciñas de Ordes
tiveran que soportar os inconvenientes que o seu tránsito supón en materia de
contaminación ambiental, acústica e na fluidez do tráfico rodado en xeral”
puntualiza o rexedor.
“Xa dende o Mesón do Vento poden chegar directamente á central
térmica. Tamén poden coller o desvío situado a man esquerda cara a Orellán para
seguir ao encoro de San Cosmade, con dirección a Bailía, para finalizar no
vertedoiro da Areosa”.
Informe da Policía Local
O
Concello de Ordes incluso ordenou a realización dun informe por parte da Policía
Local para avaliar a conveniencia e a posibilidade de ordenar esta medida, a
cal foi asumida tras analizar pormenorizadamente a ruta e estudar a viabilidade
do tránsito de camións de gran tonelaxe por este tipo de vías.
“O arranxo desta estrada é unha cuestión
de máxima prioridade para nós debido ao seu estado e ao seu agravamento tras as
últimas chuvias. Todo iso unido ás predicións de cara ás vindeiras semanas
leváronnos a ter que presentar pola vía de urxencia unha proposta para que a titularidade
desta estrada supramunicipal fose asumida pola Xunta de Galicia, co fin de que
asumira o custo do seu arranxo”.
Unha medida que foi rexeitada tanto polo PP
como polo BNG e cualificada por Regos de “inconcibible e moi criticable” dado “o
coñecemento de primeira man que teñen tanto da situación veciñal como da
imposibilidade para solucionar este arranxo por parte das arcas municipais”.
Deterioro da estrada de Mercurín
“Tal
e como vimos denunciando e advertindo dende hai tempo, a estrada de Mercurín
padece tal deterioro que de non adoptar esta medida tan drástica en breve nin os
veciños e veciñas da zona nin os autobuses escolares nin ningún tipo de
vehículo poderían transitar por ela. Unha situación que suporía o illamento
total dos centos de veciños e veciñas desta área. Acaso daquela a
Xunta vainos escoitar e atenderá o que é de xustiza para a cidadanía?”, asevera
o alcalde ordense.
Dende alcaldía vénse reclamando esta
intervención dende que no ano 2008 se iniciaran as conversas con Sogama. En
2009 asínase o convenio coa Xunta para a redacción do proxecto. Tras varias
reunións e encontros no ano 2011 reitérase unha vez máis á Consellería de Economía
e Industria e ao Director Xeral de Enerxía e Minas, Ángel Tahoceso, a
necesidade de acometer a obra.
Informe técnico
Un escrito avalado cun informe técnico e no que
o Concello xa advirte da necesidade de ter que restrinxir o tráfico pesado por
ela de non obter unha resposta satisfactoria. No ano 2012 o alcalde mantén un
encontro con Agustín Hernández, Conselleiro de Medio Ambiente, territorio e
Infraestruturas onde se aborda o caso.
Ao longo de 2013 mantense contacto coa
Presidencia da Xunta de Galicia, así como co Instituto para a Reestruturación
da Minería do Carbón e o Desenvolvemento das Comarcas Mineiras, sen que ninguén
ata o momento anunciara unha solución ou unha nova alternativa ás formuladas
dende o municipio.
Incluso dende o Concello, sendo
conscientes da situación económica actual e sempre levados por unha actitude
conciliadora e de consenso, en xuño de 2012 elaborouse un novo proxecto de
arranxo e mellora que reducía á metade o investimento inicial. A cifra ascendía
a pouco máis de 1.200.000 euros, sen que isto supuxera tampouco, tal e como é
evidente, a solución.
*
