Xesús Pedreira: "As intervencións propostas foron escollidas con realismo e sen esaxeracións, atendendo ás necesidades máis urxentes"
O portavoz municipal do PsdeG-PSOE en Ordes, Xesús
Pedreira, presentou hoxe a relación de investimentos para saneamento e para a
rede viaria municipal que proporán acometer dentro do Plan de Obras e Servizos
(POS) en 2014.
O investimento proposto achégase aos 150.000 euros e componse de
diversas reivindicacións dos veciños que os socialistas xa foron recollendo ao
longo do ano e que, pola súa necesidade, trasladaron ás sucesivas sesións
plenarias da corporación.
A actuación de maior volume económico que
solicitan incluír no POS é a dotación dun sistema de bombeo para o saneamento
da Brea, na parroquia de Ardemil. Precisaría un investimento de 75.000 euros e
serviría para avanzar na implantación do servizo na zona.
En canto á rede viaria municipal, os socialistas
propoñen o acondicionamento da pista da Codeseda, na parroquia de Leira, para a
que se precisarían uns 18.000 euros, a reparación do vial que comunica A
Espenica co Regueiro, na parroquia de Ordes (18.000 euros), a dotación de
aglomerado en quente para o tramo que une a N-550 coa zona da Fraga, a altura
da gasolineira (15.000 euros), o arranxo da pista que vai desde a Igrexa ata O
Ludiño, en Pereira (6.000 euros), e a preparación dos camiños entre O Carballo
e A Casanova (7.000 euros) e desde a Ameixeira ata a AP-9 (5.000 euros), na
parroquia de Vilamaior.
Pedreira explicou que as intervencións propostas
foron escollidas “con realismo e sen esaxeracións”, atendendo ás necesidades
máis urxentes dentro dos límites orzamentarios do Plan de Obras e Servizos.
Por
eso, o portavoz socialista anticipa que apoiarán a proposta de obras a incluír
no POS que se leve a pleno na medida en que as peticións dos socialistas sexan
recollidas.
*
